Gikalipay sa Senate Impeachment Court ug sa House prosecution team ang desisyon sa Korte Suprema nga ibasura ang tulo ka petisyon nga nangwestyon sa dos-tersyang voting threshold para sa impeachment trial ni Bise Presidente Sara Duterte. Matud pa kang Atty. Reggie Tongol, spokesman sa impeachment court, gisalikway kini tungod sa kakuwang sa legal standing ug pagka-premature sa maong mga petisyon, diin nagpamatuod usab kini sa kagawasan sa Senado isip usa ka impeachment court.
Tungod niini, magpabiling nagabarog ang desisyon niadtong Setyembre 23 nga ang hugpong sa mga pulong nga “all members of the Senate” nagpasabot lamang sa mga senador nga legal ug tinuod nga makasalmot sa botohan. Kahinumdoman nga 13 ka senador ang miuyon sa pag-usab sa interpretasyon sa 16-vote threshold, samtang si Presiding Officer Francis “Chiz” Escudero ang bugtong misupak ug unom ang mi-abstain.
Gibutyag sab nina Rep. Terry Ridon ug Rep. Chel Diokno gikan sa House prosecution nga malipayon nilang gihangop ang desisyon tungod kay naghatag kini og klarong direksyon aron dili maantala ang pagpadayon sa paglilitis. Alang kanila ug sa uban pang mga tigpamaba nga sila Robert Ace Barbers ug Zia Alonto Adiong, makatabang kini aron hingpit nga mapresentar sa prosekusyon ang ilang mga ebidensya ug mahuman ang proseso hangtod sa pinal nga paghukom.
Photo courtesy: Supreme Court PH
