Nasakmit sa kapulisan ang 1,045 ream sa Modern cigarettes nga gituohang gipalusot nga smuggled nga sigarilyo nga mokabat sa ₱836,000, atol sa operasyon sa Libertad, Misamis Oriental, Diin duha ka lalaki ang nadakpan human mapahunong ang ilang gisakyang puti nga SUV.
Ang mga suspek giila sa alyas nga “Alnoor,” 34 anyos, Drayber, ug “Habi,” 40 anyos, Pasahero. Matud sa kapulisan, nadakpan ang duha human makadawat og impormasyon ang mga otoridad bahin sa maong sakyanan nga giingong naglikay sa mga checkpoint ug naggamit og mga alternatibong rota.
Sa inisyal nga imbestigasyon, gituohang gikan sa Marawi City ang mga sigarilyo ug gitakdang ihatod sa mga lugar sa Laguindingan ug Cagayan de Oro. Gidala na sa Libertad Municipal Police Station ang duha alang sa dokumentasyon ug profiling, samtang ang mga nakumpiskang sigarilyo giturnover sa Bureau of Customs.
Ang SUV gibalik sa tag-iya human mapamatud-ang husto ang mga dokumento niini, samtang posible nga kasuhan ang duha ka suspek depende sa resulta sa dugang nga imbestigasyon ug legal nga pagsusi.
