Samdan sa tuong bahin sa tiyan ang usa ka 54-anyos nga lalaki nga residente sa Purok 1A, Barangay Dagumbaan, Maramag, Bukidnon, human gidunggab sa 23-anyos niyang kauban sa inom nga taga-Purok 1 sa samang barangay atol sa usa ka drinking session sa Purok 10, Dagumbaan, alas-4:00 sa hapon kagahapong adlawa, Dominggo, Nobyembre 15, 2026.
Base sa inisyal nga imbestigasyon sa Maramag Municipal Police Station (MPS), niulbo ang mainitong panaglalis tali sa duha hinungdan nga nibunot og kutsilyo ang suspek ug gidunggab ang biktima sa wala pa kini nisibat padulong sa habagatang direksyon, samtang gidala ang biktima sa Bukidnon Provincial Hospital (BPH) Maramag alas-7:50 sa gabii kung asa anaa na kini sa stable nga kahimtang.
Nagpadayon karon ang hot pursuit operation sa Maramag MPS—uban ang koordinasyon sa mga opisyal sa kasikbit nga barangay sama sa Bagong Silang alang sa dinaliang pagkasikop sa suspek ug pagsulbad sa maong kaso.










