Gisugdan na sa lokal nga panggamhanan sa Sumilao ang pagpatuman sa Sidlak Care Package, usa ka regular nga programa nga mohatag og libreng groceries nga ihatod mismo sa panimalay sa mga senior citizens matag tulo ka bulan.
Matod ni Sumilao Mayor Venice Marie P. Villo,gitumong ang maong inisyatiba aron makatabang sa adlaw-adlaw nga galastohan sa mga katigulangan nga dili na makasugakod sa bug-at nga trabaho, diin ang mga kawani mismo sa LGU ang magpahigayon og door-to-door delivery aron dili na sila mahago sa pag-adto sa munisipyo matag quarter
Giklaro sa munisipyo nga ang mga representante mismo sa mga senior citizens ang mipili sa maong mga batakang produkto—imbes nga mga gatas alang sa espesipikong kondisyon, adult diapers, o mga utanon nga dali ra madaut—aron masiguro nga magamit kini dili lang sa mga lolo ug lola, kundili apil na usab sa ilang tibuok pamilya.
Ang pagpanghatag sa maong hinabang ipatuman pinaagi sa phased rollout sugod karong tuig 2026 alang sa mga nag-edad og 80 anyos pataas, sundan sa 75 anyos pataas (ug posibleng 70 pataas) sa tuig 2027. Sa mosunod nga katuigan, hinay-hinay nga ipaubos ang age requirement hangtod nga ang matag residente sa Sumilao nga motungtong sa edad nga 60 anyos awtomatiko nang makadawat sa maong ayuda matag tulo ka bulan isip usa ka malungtarong programa sa lungsod.
Photo courtesy: Mayor Nice Villo/FB










