Miabot sa 24 ang namatay samtang 11 ang samaran human magbangga ang usa ka bus ug truck duol sa Kaziranga National Park sa Assam, amihanan-sidlakan sa India. Ang mga nasamdan gidala sa Jorhat Medical College and Hospital alang sa pagpatambal.
Matud sa opisyal, pipila sa mga namatay mga estudyante sa kolehiyo apan wala pa kini mailhi sa publiko. Gisuta pa ang hinungdan sa aksidente, human adunay mga nakasaksi nga mitaho nga posibleng nagpadagan og paspas ang usa sa mga sakyanan.
Gipadayag ni Assam Chief Minister Himanta Biswa Sarma ang iyang kasubo sa insidente ug giingong prayoridad karon ang paghatag og dinaliang medikal nga pag-atiman sa mga nasamdan.
Photo Courtesy:IndianRepublic.in










