Misumite na sa iyang resignation si Indonesian Vice President Gibran Rakabuming Raka ngadto kang Presidente Prabowo Subianto ug sa parlamento niadtong Huwebes, Nobyembre 12, taliwala sa kontrobersiya bahin sa iyang diploma sa high school ug mga pangutana sa iyang kwalipikasyon sa paglingkod sa maong katungdanan.
Gikumpirma ni Prabowo nga gidawat niya ang resignation ni Gibran, nga anak sa kanhi Indonesian President Joko Widodo. Si Gibran, 39 anyos, duha pa lamang ka tuig nga nagserbisyo sa iyang lima ka tuig nga termino isip bise presidente sa nasud.
Nagsugod ang kontrobersiya human nagpagawas og mga desisyon ang Constitutional Court ug Supreme Court nga nag-ingon nga ang mga dokumento nga gisumite ni Gibran kalabot sa iyang edukasyon sa gawas sa nasud wala makatuman sa mga rekisito sa eleksyon. Gikuwestiyon usab sa iyang mga kritiko kon nakakuha ba gyud siya og diploma sa high school.
Sa laing bahin, 120 ka magbabalaod gikan sa walo ka partido ang nagsumite og petisyon nga mahimong mosangpot sa proseso sa impeachment batok kaniya. Ubos sa balaod sa Indonesia, kinahanglan magtukod ang House of Representatives og espesyal nga komite aron susihon kon adunay paglapas sa Konstitusyon sa iyang paglingkod isip bise presidente.
Matod sa Konstitusyon sa Indonesia, dili awtomatikong magpahigayon og bag-ong eleksyon kon mabakante ang posisyon sa bise presidente. Ang People’s Consultative Assembly maoy mopili og kapuli gikan sa duha ka kandidato nga itudlo sa presidente sulod sa 60 ka adlaw.
Photo courtesy:Simple wikipedia










