Nagsaad si South Cotabato Governor Reynaldo S. Tamayo Jr. nga paningkamotan nga makab-ot ang hustisya alang sa walo ka anyos nga batang babaye nga namatay human maaksidente ang ilang gisakyang motorsiklo ug police patrol vehicle sa General Santos Drive, Koronadal City niadtong Nobyembre 10, 2026.
Gipahayag ni Tamayo ang iyang dakong kasubo sa pagkamatay sa bata, nga kauban sa iyang lola nga nagsakay sa motorsiklo atol sa aksidente.
Base sa inisyal nga imbestigasyon, gikan sa Barangay Morales padulong sa sentro sa siyudad ang patrol vehicle sa Sultan Kudarat Police Mobile Force Company dihang nabanggaan niini ang motorsiklo nga gisakyan sa duha ka biktima.
Parehong naangol ang bata ug iyang lola ug gidala dayon sa ospital. Apan wala na maluwas ang walo ka anyos nga bata, samtang padayon pang gitambalan ang iyang lola.
Gipasabot sa gobernador nga kinahanglan maimbestigahan pag-ayo ang maong aksidente ug panagutan sa bisan kinsa nga mapamatud-ang adunay kalambigitan sa insidente.
Gipasalamatan usab niya si PRO-12 Regional Director PBGEN Alan B. Manibog sa dali nga pagresponde ug pagsugod sa imbestigasyon aron matino ang tinuod nga nahitabo.
Samtang, mipasalig ang provincial government nga tabangan ang pamilya sa ilang panginahanglan, ilabi na sa gasto sa padayon nga pagpatambal sa lola sa namatay nga bata.
Gipasiugda sa gobernador nga kinahanglan patas ug walay pinalabi ang imbestigasyon aron masiguro nga makab-ot ang hustisya alang sa bata ug sa iyang pamilya.
Photo courtesy: PLGU South Cotabato










