Arestado ang usa ka 69 anyos nga lalaki human serbisyohan og warrant of arrest sa kasong Qualified Theft, alas 4:37 sa hapon niadtong nakalabay nga adlaw, sulod sa Police Station 5 sa Barangay Tambler, General Santos City. Giila ang dinakpan nga si alyas Manoy, minyo ug residente sa Purok Calatao, Barangay Tambler ning siyudad.
Matod sa kapulisan, duha ka warrant of arrest ang giserbisyohan sa akusado kalabot sa kasong Qualified Theft ubos sa Article 310 sa Revised Penal Code, nga adunay Criminal Case Numbers 12715 ug 12716.
Ang warrant gi-isyu niadtong Hunyo 5, 2026 ni Judge Justine Keith Sarabosquez, Presiding Judge sa Regional Trial Court Branch 36, General Santos City, diin gitakda ang rekomendadong piyansa nga P40,000.00 pesos sa matag kaso.
Human sa pagserbisyo sa warrant samtang anaa na sa kustodiya sa kapulisan, gipahibalo ang suspek sa hinungdan sa iyang pagkadakop ug sa iyang mga katungod isip usa ka dinakpan, gamit ang pinulongan nga iyang nasabtan.
Gipailalom usab siya sa hustong dokumentasyon, fingerprinting ug booking procedures subay sa sumbanan sa kapulisan.










