Gipataas sa Association of Southeast Asian Nations (ASEAN) ngadto sa 4.7 porsyento gikan sa unang 4.5 porsyento ang gilaumang pagtubo sa ekonomiya sa rehiyon karong 2026. Gipahibalo kini ni Trade Secretary Ma. Cristina Roque atol sa ika-39 nga ASEAN Coordinating Council Meeting niadtong Sabado, Nobyembre 14, sa wala pa ang ika-49 nga ASEAN Summit. Gilauman usab nga motubo og 4.7 porsyento ang ekonomiya sa rehiyon sa 2027.
Bisan pa sa positibong forecast, nagpabilin nga hulga sa ekonomiya sa rehiyon ang taas nga presyo sa pagkaon ug enerhiya, nagpadayon nga panagbangi sa Middle East, posibleng pagsamok sa suplay sa enerhiya ug mga importanteng agianan sa barko, lakip na ang posibilidad sa kusog nga El Niño.
Gipadayag usab ni Roque nga nagpadayon ang Pilipinas sa pagkompleto sa 19 ka priority economic deliverables atol sa ilang pagpangulo sa ASEAN, diin 14 niini gilauman nga mahuman sa ika-49 nga ASEAN Summit ug ang nahibiling lima sa Disyembre. Lakip sa mga dagkong kalamboan ang pagpirma sa ASEAN Digital Economy Framework Agreement (DEFA), nga mag-abli og oportunidad alang sa kooperasyon sa digital transformation ug kalamboan sa ekonomiya.
Samtang, gikumpirma ni Foreign Affairs Secretary Ma. Theresa Lazaro nga napadayon sa ASEAN ang panaghiusa bisan pa sa mga tensiyon sa geopolitika ug kawalay kasigurohan sa global nga ekonomiya.
Gipasiugda usab ni Social Welfare Secretary Rex Gatchalian ang mga inisyatibo sa Pilipinas alang sa kalig-on sa pamilya, pagpangulo sa kabatan-onan, digital innovation, pagpanalipod sa kinaiyahan ug seguridad sa pagkaon.
Gihisgotan sa mga opisyal nga kinahanglan masiguro nga ang mga kasabutan ug programa sa ASEAN mahubad ngadto sa konkretong serbisyo ug oportunidad alang sa mga negosyo, trabahante ug komunidad. Ang Pilipinas maoy nagkupot sa ASEAN chairship karong tuiga ubos sa temang “Navigating Our Future, Together,” samtang ang Singapore maoy mopuli niini sa 2027.
Photo Courtesy:Linkedin










