Gilauman ang bag-ong pag-ubos sa presyo sa mga produktong petrolyo ugmang adlawa Martes, Nobyembre 17, 2026, diin pinakadako ang posibleng rollback sa diesel ug kerosene.
Base sa unang pagtaya gikan sa Mean of Platts Singapore (MOPS), mokabat sa P4 hangtod P5 matag litro ang posibleng pagkunhod sa presyo sa diesel.
Ang gasolina gilauman usab nga moubos og P3 hangtod P4 matag litro, samtang P3 hangtod P5 matag litro ang posibleng rollback sa kerosene.
Apan gipatin-aw sa mga tinubdan sa oil industry nga mahimo pang mausab ang maong mga presyo tungod kay wala pa maapil ang gasto sa ocean freight ug insurance.
Ang pag-usab-usab sa presyo sa lana sa world market nalambigit sa kahimtang sa peace negotiations tali sa US ug Iran, ingon man sa mga hulga sa suplay sa lana tungod sa mga pag-atake sa energy infrastructure sa Saudi Arabia ug sa mga ruta sa pag-agi sa mga barko sa Strait of Hormuz.










