Gipatuman sa Pagadian City Schools Division ang modified class schedule sa Zamboanga del Sur National High School o ZDSNHS isip lakang sa pagpanalipod sa kahimsog ug kaluwasan sa mga estudyante ug magtutudlo batok sa grabeng kainit sa panahon.
Sa interview sa Juander Radyo Pagadian, gipatin-aw ni Assistant Schools Division Superintendent Dr. Judith V. Romaguera, CESO VI, nga gi-adjust ang oras sa klase aron malikayan ang posibleng epekto sa taas nga temperatura sa panglawas sa mga estudyante.
Gibutyag usab sa opisyal nga 21 na sa kinatibuk-ang 82 ka eskwelahan sa dakbayan ang nagpatuman sa modified class schedule isip pagpahiangay sa nagkagrabeng kainit samtang gipadayon ang pagkat-on sa mga estudyante.
Matud ni Romaguera, ang matag school head maoy maghimo sa angay nga pag-adjust sa oras sa klase, ilabina sa sayong kabuntagon, ug isumite kini alang sa pag-apruba sa ilang District Supervisor.
Pinaagi niini, mas mapadali ang pagpatuman sa giusab nga iskedyul, ilabina sa mga eskwelahan nga direktang naapektuhan sa grabeng kainit sa panahon.
Photo courtesy:depedpagadian.org










