Nakatala ang National Food Authority (NFA) sa dakong pagkunhod sa produksyon sa palay karong kasagsagan sa wet harvest season.
Matud ni NFA Administrator Dr. Larry Lacson, usa sa mga hinungdan niini mao ang pag-atras sa pipila ka mag-uuma sa pagtanom tungod sa pagsaka sa gasto sa produksiyon, ilabi na sa presyo sa abono.
Sa pagkakaron, mokabat sa P16 hangtod P17 ang puhunan sa mga mag-uuma sa matag kilo sa palay, samtang naghulat pa ang NFA sa opisyal nga datos sa Philippine Statistics Authority aron mahibal-an ang eksaktong porsyento sa pagkunhod sa ani.
Samtang, gipaspasan na sa NFA ang pagtukod sa dugang drying facilities ug milling equipment isip pagpangandam sa sunod nga dry season harvest.
Nag-abang usab ang ahensya og dugang 65 ka pribadong bodega ug nag-ayo sa kaugalingong mga pasilidad, nga gilauman makapataas sa kinatibuk-ang kapasidad sa pagtipig sa palay ug bugas sa nasud ngadto sa usa ka milyon ka metriko tonelada.
Photo courtesy: Department of Agriculture










