Patay ang usa ka 52-anyos nga babaye human mabanggan ug maligsan sa likod nga ligid sa usa ka dump truck sa Makar-Siguel Road, atubangan sa Rowel Can Corporation, Barangay Calumpang, General Santos City, alas 3:10 sa hapon niadtong nakalabay nga adlaw.
Giila ang biktima nga si Maribeth Del Rosario Dee, residente sa Purok 1-A, Changco Village-Siguel, Barangay Bawing, Gensan. Base sa inisyal nga imbestigasyon sa kapulisan, mitabok sa karsada ang biktima gikan sa direksyon sa Rowel Can Corporation padulong sa pikas bahin sa dalan.
Apan pag-abot niini sa tunga-tungang lane, nabanggaan siya sa usa ka Sinotruk Howo dump truck nga padulong sa city proper gikan sa Police Station 5.
Tungod sa kusog nga impact, natumba ang biktima ug naipit ang iyang ulo ilawom sa likod nga wala nga ligid sa dump truck, hinungdan sa grabeng samad sa ulo nga maoy hinungdan sa iyang dihadiha nga kamatayon.
Ang maong truck gimaneho ni Michael Cerna, 46-anyos, residente sa Alabel, Sarangani Province. Gikustodiya sa kapulisan ang drayber ug ang maong sakyanan alang sa tukmang disposisyon, samtang gidala ang patayng lawas sa biktima sa Princess Funeral Homes sa Barangay Labangal, Gensan. Padayon pang giimbestigahan sa mga otoridad ang maong aksidente.










