Nagpahigayon og libreng sakay ang pipila ka lokal nga panggamhanan sa Metro Manila alang sa mga commuter nga naapektuhan sa tulo ka adlaw nga transport strike nga nagsugod niadtong Lunes, Setyembre 28.
Lakip sa mga lugar nga nagpatuman og libreng sakay ang Malabon, Manila, ug Quezon City. Sumala sa Department of Transportation (DOTr), lakip sa mga ruta nga gisakyan sa libreng serbisyo ang Quiapo-Fairview, Quiapo-Welcome Rotonda, Nagtahan-Cubao, Cubao-Fairview, ug Galleria-Taytay, lakip ang mga pabalik nga biyahe niini.
Andam usab ang National Capital Region Police Office (NCRPO) nga magpatuman og kaugalingong “Libreng Sakay” operations aron matabangan ang mga pasaherong posibleng ma-stranded tungod sa tigil-pasada.
Nagsugod karong adlawa ang tulo ka adlaw nga tigil-pasada sa transport group nga MANIBELA, samtang magpahigayon usab og protesta ang PISTON gikan Setyembre 29 hangtod 30.
Samtang, gipatuman ang bag-ong minimum fare nga P14 alang sa traditional jeepney ug P17 alang sa modern jeepney sa unang upat ka kilometro.
Matud sa mga transport group, dili igo ang fare increase aron matabangan ang mga drayber ug operator sa epekto sa pagsaka sa presyo sa petrolyo.
Photo courtesy:Philippine News Agency
