Gihangyo sa Philippine National Police (PNP) ang mga tag-iya sa pusil nga magmatngon ug makigbahin sa responsibilidad sa luwas nga pagtipig sa ilang mga armas human sa tulo ka sunod-sunod nga kaso sa pamamaril sulod sa mga eskwelahan sa nag-unang mga bulan.
Ang mga insidente nahitabo sa Tacloban City, Zamboanga City, ug South Cotabato, diin ang mga estudyante nakakuha og mga armas nga iya sa ilang mga ginikanan o paryente nga nagtrabaho sa gobyerno. Tungod niini, gilunsad sa PNP Civil Security Group ang usa ka nationwide nga “Gun Safety Advocacy Campaign” aron pauswagon ang responsableng pagpanag-iya, insaktong pag-tipig, ug luwas nga paggunit sa pusil aron malikayan ang dili awtorisadong paggamit niini.
Matud pa ni PNP chief Jose Melencio Nartatez Jr., ang mga insidente nagpahinumdom sa tanan nga dili angay pasagdan ang kaluwasan sa pusil ug ang pagpanag-iya niini nagdala og padayon nga obligasyon sa pagbantay ug pagseguro nga kini anaa sa luwas nga kahimtang. Giawhag usab ang mga rehiyonal ug lokal nga yunit sa kapulisan sa pagpalig-on sa ilang kampanya sa impormasyon ug pagpahigayon og mga seminar.
Samta,ng si Akbayan Party-list Rep. Chel Diokno niduso og House Resolution No. 1468 nga nagtinguha sa pagpahigayon og nationwide safety audit, inspeksyon, ug imbentaryo sa tanang pusil nga gihuptan o gipanag-iya sa mga opisyal ug empleyado sa gobyerno aron maseguro nga dili kini mahulog sa sayop nga mga kamot ug manubag ang mga nakasala.
Bisan pa man nga legal ang pagpanag-iya og pusil sa Pilipinas ubos sa saktong lisensya ug rehistro, ang mga nahisgutang trahedya nagbilin og dakong pikas sa kasaysayan, lakip na ang kamatayon sa tulo ka estudyante sa Tacloban City niadtong Hunyo 22, duha sa Ateneo de Zamboanga niadtong Agosto 18, ug ang pinakaulahing insidente sa Banga, South Cotabato niadtong Setyembre 18 diin tulo ang patay ug unom ang naangol.
Photo courtesy: PressOne.ph
