Malampuson nga nag-debut sa senior continental stage si Albert Ian Delos Santos human niya nasakmit ang bronze medal sa men’s 70kg weightlifting event sa 2026 Asian Games nga gipahigayon sa Nagoya City Trade and Industry. Dili lang basta medalya ang nauli sa 20-anyos nga Pilipinong weightlifter, kundi usa usab ka bag-ong junior world ug Asian record human siya nakatala og 183 kg sa clean and jerk sa iyang ikatulo ug kataposang attempt.
Nalabwan ni Delos Santos ang iyang daang junior world ug Asian record nga 180kg dihang malampuson niyang giisa ang 181kg sa iyang ikaduhang attempt. Sa iyang kataposang pagsulay, mas gipabug-at pa niya ang hagit ug gipasaka kini ngadto sa 183kg aron usab pagbasag sa iyang kaugalingong rekord. Sa bahin sa snatch, nakatala siya og 141kg, diin miabot sa 324kg ang iyang kinatibuk-ang na-aswat aron masiguro ang ikatlong pwesto sa podium.
Naapsan niya ang pambato sa Uzbekistan nga si Adkhamjon Ergasev, kinsa nagtapos sa ikaapat nga pwesto nga adunay 318kg total, samtang nasakmit ni Ri Wun Ju sa North Korea ang gintong medalya nga adunay 349kg, ug gipulihan ni Masanori Miyamoto sa Japan ang ikaduhang pwesto nga may 342kg. Ang kadaugan nagtimaan sa nindot nga pagsugod ni Delos Santos sa iyang unang Asian Games appearance.
Photo courtesy: David Gray / AFP
