Gideklarar sa mga awtoridad sa Bangkok, Thailand ang flood disaster sa tibuok kapital human sa hapit 48 ka oras nga grabeng pag-ulan nga misangpot sa pagbaha sa mga balay, tindahan ug kadalanan. Base sa mga opisyal, kapin 300 millimetro sa ulan ang natala sa pipila ka lugar gikan Huwebes sa hapon hangtod Sabado sa buntag.
Tungod niini, gipamub-an ni Prime Minister Anutin Charnvirakul ang iyang biyahe sa London aron makabalik sa Thailand. Gideklarar sa Bangkok Metropolitan Administration o BMA ang disaster sa tanang 50 ka distrito sa siyudad aron mahatagan og espesyal nga gahum ang mga lokal nga organisasyon sa pag-atubang sa sitwasyon.
Daghang residente ang napugos sa pagsira sa ilang mga tindahan ug nagpabilin sa ilang mga balay tungod sa taas nga tubig. Samtang, giingon ni Bangkok Governor Chadchart Sittipunt nga nag-stabilize na ang sitwasyon. Kung dili na mosunod ang dugang nga ulan, gilauman nga mokabat og duha hangtod tulo ka adlaw ang paghubas sa tubig baha.
Photo courtesy:x.com
