Magpatuman og duha ka adlaw nga nationwide transport strike ang grupong PISTON sa Setyembre 29 ug 30 tungod sa padayon nga pagsaka sa presyo sa mga produktong petrolyo. Matod ni PISTON National President Mody Floranda, gibanabana nga mokabat sa 70,000 hangtod 100,000 ka jeepney driver ug operator ang gilauman nga moapil sa tigil-pasada.
Sumala kang Floranda, ilang ipares ang protesta sa gipaabot nga sunod nga oil price hike nga posible kuno mosaka og kapin 10 pesos matag litro. Lakip sa mga panawagan sa grupo ang pagtangtang sa VAT ug excise tax sa mga produktong petrolyo, pagpaubos sa presyo sa lana ngadto sa 55 pesos matag litro, ug pagwagtang sa Oil Deregulation Law.
Nanawagan usab ang PISTON alang sa living wage o igo ug makatarunganong sweldo para sa mga trabahante sa transport sector. Samtang, mipadayag usab og suporta sa maong protesta ang labor group nga Kilusang Mayo Uno o KMU, lakip ang ubang progresibong mga grupo.
Photo courtesy: PISTON Land Transport Coalition
