Gitan-aw sa Estados Unidos ang dakong posibilidad nga mahimong kabahin ang Taiwan sa Luzon Economic Corridor, ilabina sa sektor sa semiconductors, advanced manufacturing ug artificial intelligence o AI.
Sumala ni U.S. Ambassador Heather Variava, dako ang oportunidad alang sa dugang nga pamuhunan sa mga kompanya gikan sa Taiwan, ilabina tungod sa ilang lig-on nga kapasidad sa maong mga industriya.
Ang Luzon Economic Corridor usa ka inisyatiba sa Pilipinas, Estados Unidos ug Japan nga nagtumong sa pagpadali sa pamuhunan ug pagpalambo sa transportasyon, logistics, enerhiya, digital infrastructure ug advanced manufacturing sa Subic, Clark, Manila ug Batangas.
Gipunting usab sa mga opisyal sa Estados Unidos ang pagdani sa pribadong sektor sa pagpamuhunan, lakip na ang mga proyekto sa freight rail, nickel ug cobalt processing, pagpalambo sa Subic Bay port ug digital connectivity.
Samtang, giingon ni Variava nga ang Taiwan dugay na nga interesado sa maong corridor. Apan hangtod karon, wala pa’y pormal nga kasabutan o piho nga investment gikan sa Taiwan nga direktang gilambigit sa proyekto.
Gilauman sa Estados Unidos nga magpadayon ang Luzon Economic Corridor bisan pa sa umaabot nga pag-ilis sa administrasyon, samtang gipasiugda nga ang mga proyekto niini mahimong molungtad lapas sa termino sa kasamtangang gobyerno.
Photo Courtesy: PNA
