Nangayo og dugang fuel subsidy ug mas epektibong pagkontrol sa presyo sa krudo ang Northern Bukidnon Transport Service Cooperative (NOBTSCO) aron matabangan ang mga transport operators ug drayber nga grabe nga naapektuhan sa padayon nga pagmahal sa gasolina ug diesel.
Gipadayag ni NOBTSCO Manager Racel D. Mapute sa pakighinabi sa Juander Radyo Malaybalay nga dako kaayo ang epekto sa mahal nga presyo sa lana sa adlaw-adlaw nga kita sa mga nagpadagan og multicab, jeep, ug bus.
Gipasabot niya nga bisan pa man giusab ug gipatas-an ang subsidy gikan sa ₱1,500 ngadto sa ₱1,800 kada semana alang sa mga kwalipikadong public utility vehicles nga nag-diesel, dili pa gihapon kini igo—labina kon magpadayon ang pagsaka sa presyo sa lana nga posibleng molapas na sa ₱100 kada litro. Giangkon usab niya nga kinahanglang maapil sa maong tabang ang mga sakyanang gasolina ang gamit tungod kay pareho ra silang nag-antos sa maong krisis.
Gitumbok sa kooperatiba nga kinahanglang mag-andam ang gobyerno og epektibong mga programa aron mapugngan ang pag-saka sa gasto sa operasyon. Tungod kay padayon nga nagserbisyo ang ilang mga sakyanan sa syudad sa Malaybalay ug sa tibuok lalawigan sa Bukidnon, nanawagan sila ug suporta gikan sa lokal ug nasudnong panggamhanan aron mapadayon ang ilang serbisyo sa publiko
Photo Courtesy: NOBSTCO/Gasoline Station Malaybalay
