Mokabat sa 9,810 ka trabahante sa Caraga Region ang nakadawat og kinatibuk-ang P50.6 milyon nga sweldo pinaagi sa TUPAD program sa Department of Labor and Employment (DOLE) atol sa nationwide “Handog ng Pangulo: Serbisyong Sapat para sa Lahat” niadtong Lunes.
Sumala sa DOLE-Caraga, gipahigayon ang programa kauban ang mga provincial government pinaagi sa ilang Public Employment Services Offices (PESO) aron madala ang temporary employment assistance mas duol sa mga komunidad.
Pinakadaghan sa mga benepisyaryo gikan sa Surigao del Sur nga mikabat og 3,972 ka trabahante nga nakadawat og P20.1 milyon. Gisundan kini sa Agusan del Norte nga adunay 2,649 ka benepisyaryo ug P13.2 milyon nga wages.
Sa Surigao del Norte, 2,278 ka trabahante ang nakadawat og P10.8 milyon; Dinagat Islands, 661 ka benepisyaryo ug P5.07 milyon; samtang Agusan del Sur, 250 ka trabahante ug P1.28 milyon.
Samtang, dungan usab nga gipahigayon ang job fairs sa nagkadaiyang probinsya sa rehiyon diin 107 ka aplikante ang nadawat dayon sa trabaho.
Sa mga nadawat, 52 gikan sa Surigao del Sur, 27 sa Surigao del Norte, 18 sa Agusan del Norte, pito sa Agusan del Sur, ug tulo sa Dinagat Islands.
Photo courtesy: DOLE Caraga
