Mas pahugtan pa sa General Santos City Police Office o GSCPO ang pagpatuman sa curfew sa mga menor de edad ug sa mga lagda batok sa pagbaligya ug pag-inom og ilimnong makahubog sa mga pampublikong lugar.
Sumala kang PCol. Ariel Acala, City Director sa GSCPO, ang direktiba gisunod human sa mga milabayng insidente sa siyudad, lakip na ang usa ka rumble o away nga nag-viral sa social media.
Gimandoan ni Acala ang mga station commander nga hugot nga ipatuman ang curfew sa mga minor matag gabii, ingon man ang mga lagda sa liquor ban.
Gimanduan usab ang mga kapolisan nga manita ug mosita sa mga tawo nga magpadayon sa pag-inom sa pampublikong lugar kung lapas na sa gitugot nga oras, isip lakang aron malikayan ang mga kagubot ug mapadayon ang kalinaw ug kahapsay sa siyudad.
