Mga kajuander, kung makakita mo og traffic light, ayaw dayon kahadlok… basin para sa uban, dili na traffic light—electronic assault weapon matod pa. Sa Devon, England, duha ka pensioner nga nag-edad 60s ug 70s ang nadakpan human gi-tamper ug giputlan og mga wire ang sensors sa traffic light sa lungsod sa Ilfracombe.
Ang duha kabahin matod pa sa grupo nga gitawag og “Blade Runners,” nga nagtuo nga ang modernong traffic light dili lang para makontrol ang trapiko, kundili usa ka “phased array electronic assault weapon.”
Sumala sa ilang mga conspiracy theory, ang teknolohiya sa traffic lights mahimong hinungdan sa seryosong problema sa panglawas, apil na ang heart attack, brain cancer ug kalit nga kamatayon.
Pero mga higala, asa man ang ebidensiya? Walay scientific evidence nga ang traffic light makahimo og target sa tawo aron patyon.
Matod sa Devon and Cornwall Police, liboan ka pounds ang kadaot nga ilang nahimo ug mahimo pa silang nakapameligro sa mga motorista.
Mao nga gidakop ang duha tungod sa criminal damage ug pagpahinabo og peligro sa mga road user, apan temporaryo silang gipagawas ubos sa bail.
Ang ilang motto kuno: “Dili woke, fully awake!”
Pero sa ilang pagputol sa traffic light wires…murag ang traffic light nuoy napugos og “power nap!”
Mga kajuander, conspiracy theory man o dili—ayaw gyud hilabti ang traffic light, kay kung mapalong na, ang tibuok kalsada mahimong action scene.
Photo courtesy: family handyman
