Posibleng mosaka ang presyo sa pamasahe sa mga pampasaherong eroplano sa mga mosunod nga adlaw tungod sa pagtaas sa fuel surcharge. Sumala sa Civil Aeronautics Board (CAB), gipataas ang fuel surcharge sa Level 14, nga ipatuman sugod Septiyembre 16 hangtod 30, 2026.
Kini mas taas kumpara sa Level 13 nga gipatuman gikan Septiyembre 1 hangtod 15. Tungod niini, ang mga pasaherong mobiyahe sulod sa Pilipinas mag-atubang og dugang nga fuel surcharge nga mokabat gikan P457 hangtod P1,336, depende sa ruta ug klase sa biyahe.
Samtang, mas taas ang bayranan alang sa mga pasaherong mobiyahe paingon sa gawas sa nasud, diin ang fuel surcharge mokabat gikan P1,509.08 hangtod P11,220.71. Ang pagtaas sa fuel surcharge nalambigit sa bag-ong pagsamot sa tensiyon ug kagubot sa Middle East, nga nakaapekto sa presyo ug suplay sa enerhiya sa global market.
Gilauman nga ang maong pagtaas sa surcharge mahimong makaapekto sa kinatibuk-ang gasto sa mga pasahero, ilabina sa mga adunay nakaeskedyul nga biyahe sa mga mosunod nga semana.
Photo courtesy: Philippine Airline
