Tanggong sa estasyonan sa kapulisan ang usa ka lalaki human nag-amok ug misulay sa pagtigbas gamit ang sundang batok sa opisyal sa Sumilao Municipal Police Station niaging adlaw.
Sa exclusive nga pakighinabi sa Juander Radyo Malaybalay ni PSMS Edil O. Sulihon, giingong nagsugod ang kagubot dihang naglabay og dakong bato ang suspek sa gawas sa estasyonan ug nanghasi dayong miadto sa national highway busa girespondihan sa kapolisan sa pagpangulo ni PCapt Arlie Cardinal OIC sa Sumilao MPS kung asa dihang gipangitaan ug paagi aron badlongon, kalit lang kining mitigbas sa opisyal apan nasagang ra hinungdan nga dali siyang nakontrolar ug nadakpan
Gitan-aw karon sa kapulisan ang posibilidad nga adunay problema sa pamilya o personal nga isyu ang suspek nga misangpot sa pag-amok, diin mag-atubang kini og kasong sibil ug Direct Assault.
Tungod sa insidente, nagpahimangno si PSMS Sulihon sa mga lumulupyo nga likayan ang pagpaagi sa init sa ulo ug alak sa pag-atubang sa problema, ug mas maayong makig-storya sa pamilya o barangay aron malikayan ang pag-atubang og bug-at nga kaso sa balaod
Photo Courtesy: Sumilao Municipal Police Station
