Nasikop sa kapulisan sa Carigara Municipal Police Station (MPS), ubos sa pagpangulo ni PMAJ Ronald D. Espina, ang Top 1 Provincial Most Wanted Person nga nailhan sa alyas nga “Tino,” 45 anyos, nga giatubang ang duha ka kaso sa Qualified Rape of a Minor ug usa ka kaso sa Rape Through Sexual Assault didto sa sa Barangay East Visoria, Carigara, Leyte niadtong Nobyembre 2, 2026.
Gihimo ang operasyon pinaagi sa Manhunt Charlie Operation, kauban ang LPPO Provincial Intelligence and Detective Management Unit (PIDMU) Tracker Team, Provincial Intelligence Team Leyte ug Regional Intelligence Unit 8 (RIU).
Ang suspek gidakop pinaagi sa gipagawas nga warrant of arrest sa Regional Trial Court (RTC), Branch 36, Carigara, Leyte. Walay girekomendar nga piyansa alang sa duha ka kaso sa Qualified Rape of a Minor, samtang ₱200,000 ang girekomendar nga piyansa alang sa kaso sa Rape Through Sexual Assault.
Gipahibalo usab ang dinakpan sa hinungdan sa iyang pagdakop ug sa iyang mga katungod ubos sa Konstitusyon sa pinulongang iyang nasabtan. Sa pagkakaron, anaa na siya sa kustodiya sa Carigara MPS alang sa dokumentasyon ug hustong disposisyon sa dili pa itugyan ngadto sa korte nga nagpagawas sa warrant.
Gipasiugda ni PMAJ Espina nga magpadayon ang kapulisan sa pagpangita ug pagdakop sa mga wanted person, ilabina kadtong nag-atubang og seryosong mga kaso.
Photo courtesy: Carigara MPS
