Gipahinumdoman sa National Meat Inspection Service (NMIS) Region IX ang mga nagbaligya ug karne nga kinahanglan silang maghupot ug balidong Meat Inspection Certificate isip pamatuod nga legal ug lehitimo ang ilang pagbaligya ug karne.
Matud ni NMIS-9 Regional Technical Director Dr. Rudio Abulencia, kanunay nga nagahimo ang ilang buhatan og pagpangumpiska sa mga karne gikan sa mga meat vendor nga wala magsunod sa meat safety regulations, lakip na ang pagbaton ug Meat Inspection Certificate.
Gipasabot usab ni Dr. Abulencia nga importante ang maong dokumento aron masiguro nga ang karne nga gibaligya sa merkado miagi sa hustong inspeksiyon ug nakasunod sa mga sumbanan sa food safety.
Dugang pa niini, ang mga karne nga walay tukmang dokumento mahimong kumpiskahon sa mga otoridad isip kabahin sa ilang kampanya batok sa ilegal nga pagpamaligya sa karne.
Giawhag usab ang mga meat vendor nga siguruhong kompleto ug balido ang ilang mga dokumento aron malikayan ang pagsumpo sa ilang pagpamaligya ug mapanalipdan ang panglawas sa mga konsumante.
Tumong niini nga mapugngan ang pagbaligya sa mga karne nga posibleng makadaot sa panglawas ug masiguro ang kaluwasan sa pagkaon sa publiko.
