Boluntaryong gitugyan sa residente sa Barangay Can-Untog, Ormoc City ang tulo ka loose firearms ug 18 ka buhing bala ngadto sa Ormoc City Police Station 6 (OCPS6) niadtong Nobyembre 3, 2026.
Ang mga armas naglangkob sa duha ka .38 caliber Smith and Wesson revolvers ug usa ka .38 caliber revolver nga adunay nadaot nga serial number. Kauban niini ang 18 ka buhing bala nga .38 caliber.
Sumala sa opisyal sa barangay, nahukman sa mga residente nga boluntaryong itugyan ang mga armas human sa ilang pagtambong sa Barangay Assembly, diin gipatin-aw sa mga personnel sa kapulisan ang legal nga mga sangpotanan sa pagpanag-iya og armas nga walay tukmang dokumentasyon, lakip na ang mga peligro nga mahimong ipahinabo sa dili hustong paggamit niini.
Gipasiugda ni PMAJ Barrios ang kamahinungdanon sa aktibong partisipasyon sa mga opisyal sa barangay ug sa mga residente sa pagmintinar sa kalinaw ug kahapsay sa komunidad.
Matud pa niya, ang pagpalig-on sa kooperasyon tali sa kapulisan, mga opisyal sa barangay ug katawhan maoy usa sa mga importanteng pamaagi aron mapauswag ang kaluwasan sa matag komunidad.
Giawhag usab sa kapulisan ang ubang mga barangay nga mosuporta ug mosundog sa maong inisyatibo isip kabahin sa pagpatuman sa S.A.F.E. EV campaign ug sa padayon nga kampanya batok sa loose firearms.
Gipakita sa maong boluntaryong pagtugyan ang kamahinungdanon sa panaghiusa sa komunidad ug sa kapulisan sa pagpalig-on sa kalinaw, kahapsay ug seguridad sa Ormoc City.
Photo courtesy: OCPS 6
