Nagpagawas ang Department of Labor and Employment (DOLE) Central Office sa Labor Advisory No. 18 nga naglatid sa mga giya sa pagbayad sa suhol sa mga empleyado atol sa Special Non-Working Days nga Nobyembre 1 ug 2, 2026.
Gipatin-aw ni Isidrick Paqueo, Senior Labor and Employment Officer sa DOLE Davao de Oro, nga lahi ang pamaagi sa pagbayad niini kumpara sa regular holiday nga gisaulog matag Nobyembre 30.
Matod niya, ang empleyadong motrabaho atol sa Special Non-Working Day makadawat og dugang 30 porsyento sa iyang daily rate, samtang ipatuman ang prinsipyo nga no work, no pay sa mga wala motrabaho, gawas kon adunay mas paborableng polisiya ang kompanya.
Samtang sa Nobyembre 30, nga usa ka regular holiday, ang empleyadong motrabaho makadawat og 200 porsyento kon double pay sa iyang regular daily wage.
Gipasabot ni Paqueo nga importante nga masayran sa mga empleyado ug mga employer ang kalainan sa special non-working day ug regular holiday aron masiguro ang hustong pagpatuman sa mga benepisyo ug bayad sa mga mamumuo subay sa mga lagda sa DOLE.
