Nangalag-kalag sulod sa bilangoan ang upat ka Regional Most Wanted Persons (RMWPs), lakip ang mga indibidwal nga nag-atubang og daghang kaso kalabot sa giingong sekswal nga pag-abuso sa mga menor de edad, human sila nadakpan sa managlahing operasyon sa kapulisan sa Laguna ug Eastern Visayas niadtong Nobyembre 1, 2026.
Sa dakbayan sa Santa Rosa, Laguna, nadakpan ang ika-4 nga most wanted person nga giilang si alyas wael, 26 anyos, tungod sa mga kasong statutory rape ug statutory sexual assault. Walay girekomendang piyansa sa unang kaso, samtang ₱40,000 ang piyansa sa ikaduhang kaso.
Sa Bobon, Northern Samar, nadakpan ang ika-8 nga most wanted person nga giila sa alyas nga elhe, 26 anyos, nga nag-atubang og duha ka kaso sa statutory rape nga walay girekomendang piyansa.
Samtang alas-3:05 sa hapon, nadakpan sa Palo, Leyte ang ika-2 nga most wanted person nga si alyas an, 33 anyos, nga giatubang ang walo ka kaso, lakip ang duha ka kaso sa qualified rape of a minor, usa ka kaso sa qualified rape ug lima ka kaso sa qualified sexual assault. Walay girekomendang piyansa sa mga kaso sa rape, samtang ₱200,000 ang piyansa sa matag kaso sa sexual assault.
Sa Dolores, Eastern Samar, nadakpan usab ang ika-6 nga most wanted person nga giilang si alyas non, 66 anyos, nga nag-atubang og usa ka kaso sa qualified rape nga walay girekomendang piyansa.
Ang operasyon gilusad pinaagi sa pagtinabangay sa tracker teams, intelligence units ug mga lokal nga estasyon sa kapulisan, lakip ang koordinasyon tali sa PRO-4A ug PRO-8 alang sa pagdakop sa suspek sa Laguna.
Gipahibalo ang tanang nadakpang indibiduwal sa ilang mga katungod nga gilatid sa Konstitusyon ug gidala sa tukmang estasyon sa kapulisan alang sa dokumentasyon ug hustong proseso, samtang gihulat ang ilang pagtugyan ngadto sa mga korte nga nagpagula sa mga warrant of arrest.
