Nadakpan ang upat ka indibidwal sa tulo ka managlahing buy-bust operation nga gipahigayon sa Valencia City Police Station ug Bukidnon Provincial Drug Enforcement Unit (BUK-PDEU) sa nagkadaiyang dapit sa Valencia City, Bukidnon niaging Oktubre 2026.
Ang unang operasyon nahitabo sa Purok 13, Barangay Poblacion pasado alas 5:55 sa hapon diin nadakpan si alyas “Junjun”, 32 anyos, ug nakuhaan og gidudahang shabu nga nagkantidad og ₱35,360 sa street drug price (SDP). Nasundan kini sa ikaduhang operasyon sa Purok 2 sa maong barangay alas 9:00 sa gabii diin nadakpan usab si alyas “Glen”, 45 anyos, nga nasakmitan og drogang nagkantidad og ₱34,680.
Samtang sa ikatulong operasyon nga gipahigayon sa Purok 1A, Kawayanon, Barangay Lumbo alas 10:25 sa gabii, nadakpan ang duha ka residente gikan sa Santa Cruz, Davao del Sur nga sila alyas “Dandan”, 36 anyos, ug alyas “Jar”, 39 anyos. Nakumpiska gikan sa duha ang pinakadakong kantidad sa ilegal nga droga sa maong mga operasyon nga miabot sa ₱244,800.
Sa kasamtangan, ang upat ka mga suspetsado anaa na sa kustodiya sa Valencia City Police Station ug giandam na ang pagpasaka og tukmang mga kaso batok kanila.
Photo courtesy: Valencia City Police Station
