Gilunsad sa Malaybalay City Scholarship Program ang usa ka mabulukong upat ka adlaw nga Environmental Initiative Activity nga adunay temang “Scholar for Nature: Cultivating Care, Sustaining Our Future” niaging bulan sa Oktubre 2026. Ang maong kalihokan gipangulohan sa Community Affairs Division (CAD) sa City Mayor’s Office ubos sa pagdumala ni Division Head Venus G. Palalay, sa pakigtambayayong sa City ENRO, City Agriculture Office, ug CDRRMO.
Personal usab nga mitambong sa pagbukas sa inisyatibo si City Mayor Jay Warren R. Pabillaran, diin iyang gipasiugda ang dako ug kamahinungdanong papel sa kabatan-onan sa pagpanalipod sa kinaiyahan ug sa pagpalambo sa komunidad.
Puno sa praktikal nga mga buluhaton ang maong kalihokan diin ang matag ang-ang sa kolehiyo adunay tagsa-tagsa ka assignment alang sa kalikopan. Ang mga 1st year ug 2nd year scholars nagbutang ug nagbalhin og mga seedlings sa CENRO ug City Agriculture Office Nursery, samtang ang mga 3rd year ug 4th year scholars nipahigayon og pagpanglimpyo ug pag-ibot sa mga sagbot sa CDRRMO ug City Tree Parks.
Pinaagi niining paningkamot, gilauman nga ang mga iskolar dili lamang magmalampuson sa ilang pagtuon, kundi mahimo usab nga mga responsable nga lider nga magbalantay sa malungtarong kalamboan sa Malaybalay City.
Photo courtesy: LGU Malaybalay City
