Nagpabilin nga hapsay, malinawon, ug walay natala nga dagkong insidente sa tibuok lalawigan sa Bukidnon taliwala sa gipatuman nga mga operasyon sa seguridad sa kapolisan.
Sa usa ka pakighinabi, gipahayag ni PCPT Leonila R. Vicente, OIC Spokesperson sa Bukidnon Police Provincial Office (BPPO), nga manageable kaayo ang sitwasyon sa kalinaw ug kasegurohan sa rehiyon, ilabina sa ilang pagpangandam ug pagpahimutang sa mga sakop sa kapulisan alang sa nagkaduol nga saulog sa kapaskuhan.
Sumala pa, aron masiguro ang kaluwasan sa publiko, gipatas-an sa ahensya ang visibility ug deployment sa mga pulis sa mga tulunghaan, convergence areas, ug mga tourist destinations nga kanunayng gidugok sa mga bisita.
Gawas pa niini, padayon usab ang ilang pagpatuman sa Oplan Bakal-Sita ug Oplan Safer City pinaagi sa pagpahigayon og mga surprise checkpoint ug patrols sa mga kadalanan.
Samtang, naghangyo ang kapulisan sa publiko nga magpabilin nga magmatngon ug makig-alayon kanila pinaagi sa pag-report sa Dial 911 o sa pinakaduol nga istasyon kon adunay emerhensya.
Photo courtesy: BUKPPO
