Andam ang gobyerno sa South Korea sa paghatag og medical equipment ngadto sa North Korea kung hangyoon kini sa Pyongyang. Giandam na usab sa Seoul ang gikinahanglang pondo ug nakuha na ang exemption gikan sa United Nations sanctions committee alang sa maong proyekto.
Sumala sa Unification Ministry, plano sa South Korea nga maghatag og 166 ka klase sa medical equipment ngadto sa Kangdong County Hospital sa Pyongyang. Lakip niini ang mga kagamitan alang sa diagnosis, operasyon ug pagtambal.
Bisan pa sa kasamtangang UN sanctions nga nagdili sa paghatag og industrial machinery ngadto sa North Korea, lakip ang medical equipment, nakakuha na ang South Korea og pagtugot alang sa humanitarian project. Gamiton usab ang Inter-Korean Cooperation Fund sa pagpondo niini.
Gipamahayag sa Unification Ministry nga ang humanitarian assistance ipadayon bisan unsa pa ang kahimtang sa politika ug militar. Kini samtang padayon usab ang tensiyon sa duha ka Korea, human sa pagpabuto sa North Korea og daghang short-range ballistic missiles ngadto sa East Sea.
Ang maong proyekto kabahin sa Regional Development 20 X 10 Policy sa North Korea nga nagtumong sa pagtukod og modernong mga pasilidad, lakip ang mga ospital, sa mga rural nga lugar. Nahuman ang Kangdong County Hospital niadtong Nobyembre 2025.
Photo courtesy: Asia Times
