Mokabat sa 47 ka inbidwal ang gikustodiya sa mga otoridad sa Turkey human sa sunod-sunod nga pag-raid sa mga buhatan sa LGBTQ+ associations, isip kabahin sa imbestigasyon sa giingong prostitution ug obscenity, sumala sa mga prosecutor.
Sa report sa Istanbul Chief Prosecutor’s Office, gipahigayon ang operasyon sa 12 ka probinsya batok sa 38 ka suspek, diin 26 ang nadakpan. Nakumpiska usab sa mga otoridad ang mga droga, digital equipment, smuggled alcohol ug usa ka armas.
Sa laing operasyon sa Ankara, dugang 21 ka indibidwal ang gikustodiya isip kabahin sa imbestigasyon batok sa LGBTQ+ association nga Kaos GL, samtang lima pa ka tawo ang padayong gipangita. Matud sa Kaos GL, mokabat sa 50 ka aktibista ang nadakpan, lakip ang kapin 10 nga gi-raid ang mga panimalay.
Gipahayag usab sa grupo nga gibabagan sa mga otoridad ang access sa daghang websites ug social media accounts nga konektado sa LGBTQ+ organizations, activists ug rights advocates.
Ang crackdown, nga gitawag og “My Family is Safe,” kabahin sa kampanya sa gobyerno nga giingong nagtumong sa pagpanalipod sa family values, samtang gipasiugda ni President Recep Tayyip Erdogan ang “Decade of Family and Population” aron matubag ang pagkunhod sa birth rate ug nagkadaghang tigulang nga populasyon.
Photo Courtesy: Reuters
