Gipahimangnoan ni Gingoog City Mayor Eric Cañosa ang mga indibidwal nga nagapakaylap og pagpanghulga nga makahatag og kahadlok sa mga residente, ilabina sa mga magtutungha ug ilang mga ginikanan.
Kini may kalabotan sa gipakaylap nga online threat batok sa mga tunghaan sa Gingoog, diin usa ka dummy account ang nanghulga og pagpamusil ug pagpangdunggab. Na-identify na sa kapulisan ang tag-iya sa social media account ug nasuta nga taga-Medina, Misamis Oriental. Gihikay na ang tukmang kaso batok sa suspek.
Matud ni Mayor Cañosa, anaa na sa kustodiya sa kapulisan ang suspek, apan padayon gihapon ang iyang pahimangno nga dili sundon o pamarisan ang susamang mga hulga tungod sa dakong kahadlok nga mahimo niini nga mahatag sa publiko.
Alang sa dugang seguridad, nag-andam usab ang LGU-Gingoog og mga metal detector ug CCTV cameras nga ibutang sa mga tunghaan aron mapalambo ang seguridad ug pagmonitor sa mga eskwelahan.
Photo courtesy: Erick G. Cañosa
