Mahimo nang makadesignate ang mga miyembro sa PhilHealth og usa ka “Health Proxy”—usa ka tawo nga mahimong motabang sa pagdesisyon bahin sa medical care kung dili na makahimo og desisyon ang miyembro mismo.
Gipadayag sa Philippine Health Insurance Corporation nga giusab na niini ang PhilHealth Member Registration Form o PMRF aron maapil ang impormasyon sa health proxy. Sumala sa opisyal sa PhilHealth, anaa na sa internal review ang giusab nga porma ug gilauman nga ipagawas sa dili pa matapos ang Septyembre.
Nahisgot kini human gipangutana sa usa ka hearing sa Kamara kung giila na ba sa gobyerno ang health proxy. Ang inisyatiba giinspirar sa Right to Care Card Program sa Quezon City, nga gilunsad niadtong 2023 ug naggamit og Special Power of Attorney.
Samtang, gipahayag sa Department of Health nga magpagawas usab kini og memorandum nga opisyal nga moila sa health proxy sulod niining tuiga, ug ipahiuyon kini sa mga polisiya sa PhilHealth.
Photo courtesy: PressONE.PH
