Gipasidunggan sa Pangagamhanang Probinsyal sa Bukidnon, pinaagi sa Provincial Agriculture Office, ang siyam ka mga scholars sa Department of Agriculture – Agricultural Training Institute (DA-ATI). Gihatagan ang maong mga indibidwal sa plaque of appreciation ug cash incentives dungan sa gipahigayong Monthly Convocation Program niadtong Setyembre 8, 2026, didto sa Kaamulan Open Theater, Kaamulan Park, Siyudad sa Malaybalay.
Pribilehiyo para sa lalawigan tungod kay sa dose ka kinatibuk-ang scholars sa Rehiyon 10, siyam niini ang gikan sa Bukidnon. Usa kanila ang nagsubay sa post-graduate studies ubos sa Educational Grants for Extension Workers (EdGE), samtang walo usab gikan sa USTP-Claveria ug Central Mindanao University ang nag-gradwar sa agriculture-related courses pinaagi sa Educational Assistance for the Youth in Agriculture (EAsY AGRI). Dugang pa niini, lima sa maong mga scholars ang nakadawat og pinasahi nga cash incentive nga nagkantidad og ₱15,000 matag usa tungod sa ilang pagkahimong Latin Honors.
Gipahibalo usab ni Provincial Agriculturist Ma. Lilith M. Turan nga bukas ang maong oportunidad alang sa uban pang mga batan-on. Gidasig kadtong mga interesadong anak sa mga mag-uuma nga buot mo-avail sa maong programa nga bisitahon lang ang ilang tagsa-tagsa ka City o Municipal Agriculture Office alang sa dugang mga detalye ug rekisitos sa aplikasyon
Photo Courtesy: LGU – Bukidnon
