Nagpadayon ang subsob nga pagproseso sa 89th Infantry (MAKATAO) Battalion sa mga aplikasyon alang sa Amnesty ug Safe Conduct Pass sa ilang area of responsibility sa Southern Bukidnon ug mga kasikbit nga dapit.
Sa usa ka eksklusibong pakighinabi sa Juander Radyo Malaybalay, gipadayag ni Lt.Col. Antonio G. Bulao I, Battalion Commander sa 89IB 10ID PA, nga moabot sa kapin 300 ka indibidwal sa Southern Bukidnon samtang kapin 800 usab sa tibuok lalawigan ang nagsumite sa ilang aplikasyon—nga naghimo sa Bukidnon nga adunay pinakadaghang aplikante sa tibuok Rehiyon 10.
Pinaagi sa maong programa, daghan na ang nakadawat sa ilang Safe Conduct Pass samtang gipaspasan pa ang pagproseso sa ubang kwalipikadong aplikante nga naaprobahan na gikan sa Office of the President. Gipasabot ni Lt. Col. Bolao nga ang mga aduna na’y Safe Conduct Pass legal nga gihatagan og proteksyon batok sa dakop ug kaso samtang naghulat sa pinal nga deklarasyon sa ilang Amnesty. Dugang pa niya, nagpabiling hapsay ug malinawon ang sitwasyon sa kasegurohan sa Southern Bukidnon bisan pa sa pipila ka hagit nga may kalabotan sa panahon.
Dako usab ang pagpasalamat sa kadagkoan sa 89th IB ngadto sa mga lokal nga opisyal, barangay leaders, ug mga peace partners sa ilang walay puas nga suporta sa pagpatuman sa programa. Samtang sa gihapon, bukas ang ilang awhag sa mga nahabilin pang miyembro sa armadong grupo nga pahimuslan ang maong higayon sa Amnesty aron pormal nga makabalik sa sabakan sa balaod, makadawat og tabang gikan sa gobyerno, ug makapuyo og malinawon uban sa ilang mga pamilya
Photo Courtesy:89th IB
