Nadakpan na sa mga kapulisan ang giingong suspek sa pagpatay sa 63-anyos nga mag-uuma sa Purok 1, Barangay New Panay, Tulunan, Cotabato, human sa padayong hot pursuit operation niadtong nakalabay nga adlaw.
Giila ni Tulunan PNP Chief Police Major Rolando Dillera Jr. ang biktima nga si Jose Kermit Arevalo Cabrera, residente sa maong barangay. Base sa inisyal nga imbestigasyon, nag-inom ang biktima kauban ang iyang silingan ug mga higala sa ilang balay bandang alas-6:30 sa gabii niadtong Huwebes, Oktubre 22, sa dihang miabot ang suspek nga giila sa alyas Joe, 31-anyos, ug giingong miyembro sa Barangay Peacekeeping Action Team o BPAT, ug mipusil sa biktima sa makadaghang higayon. Tungod niini, namatay ang biktima human maigo sa nagkalainlaing bahin sa lawas.
Pinaagi sa padayong paningkamot sa kapulisan, nadakpan ang suspek bandang alas-3:00 sa hapon sa Purok 7, Barangay New Panay, ug positibo usab siyang giila sa mga saksi. Sumala sa pinakabag-ong update sa kapulisan, kasong murder nga walay rekomendasyon sa piyansa ang ipasaka batok kaniya. Sa kasamtangan, anaa na sa kustodiya sa Tulunan MPS ang suspek samtang nagpadayon ang imbestigasyon aron masayran ang tibuok sirkumstansiya ug motibo sa krimen.
Photo courtesy: PNP Cotabato Police Provincial Office
