Nasikop ang lima ka lalaki sa gipatuman nga hot pursuit operation sa Barangay Poblacion 6, Midsayap, Cotabato, kalabot sa gikatahong pagpangawat sa usa ka Yamaha Mio nga motorsiklo niadtong nakalabay nga adlaw.
Sumala sa Midsayap Municipal Police Station, nasakpan ang mga suspek sakay sa usa ka minivan diin nakit-an usab ang gikatahong gikawat nga motorsiklo. Giingong nagpinusilay ang mga suspek ug mga operatiba atol sa operasyon, hinungdan nga usa sa mga gidakop nakaangkon og gamayng samad sa wala nga bukton.
Gawas sa motorsiklo ug minivan, narekober usab sa mga pulis ang usa ka .45-caliber nga pistola, bala ug uban pang mga ebidensiya. Giandam na sa kapulisan ang mga kaso kalabot sa New Anti-Carnapping Act of 2016 ug Comprehensive Firearms and Ammunition Regulation Act, nga ipasaka ngadto sa Office of the Provincial Prosecutor alang sa tukmang aksiyon.
Photo courtesy: PNP Midsayap Municipal Police Station
