Gipasiugda sa Bureau of Fire Protection (BFP) Bukidnon ang paggamit sa 911 emergency hotline isip pangunang agianan sa pag-report ug pag-coordinate sa nagkalain-laing emerhensya sa lalawigan, ug dili lamang alang sa mga insidente sa sunog.
Sumala ni SFO2 Rene Rubillos, Operations Officer sa BFP Bukidnon, padayon ang ilang pagpahimangno sa publiko sa tibuok tuig aron mas madali ang paghatag og hinabang sa panahon sa krisis.
Gialima na usab ang bag-ong 911 call center sa Regional Office sa BFP nga nahimutang sa Lumbia, Cagayan de Oro City. Pinaagi niining maong pasilidad, mas paspas ug organisado nga makadawat og mga tawag ang mga bombero kabahin sa mga sunog, aksidente, ug uban pang matang sa emerhensya aron gilayon nga maka-coordinate sa pinalabi nga response team sa matag dapit.
Karong adlawa Septiyembre 9, ang pagpahigayon sa Fire Square Roadshow nga gidungan sa Rescue Olympics sa pakigtambayayong sa Department of Education (DepEd). Diha sa maong mga kalihokan, gitudlo ug gipadayag sa BFP ang sakto nga paggamit sa 911 hotline ug gipakita ang nagkalain-laing responsibilidad ug kapabilidad sa mga bombero sa pagresponde sa bisan unsang hulga ug peligro sa komunidad
Photo Courtesy:BFP – Bukidnon
