Giplastar sa pagagamhanang Probinsyal sa Bukidnon, ang usa ka strategic action plan aron pagpangandam sa hulga sa El Niño phenomenon.
Kini pinaagi sa response cluster emergency meeting nga gipatawag sa Provincial Disaster Risk Reduction and Management Council (PDRRMC) nga gipangulohan ni DRRMO IV Israel Johan Damasco, Jr. kagahapon Setyembre 8, 2026, didto sa PDRRM Operations Center Conference Room, dakbayan sa Malaybalay.
Sumala pa ang maong tigom nagtumong sa pag-ila sa mga focus areas, mga pangunang aksyon ug panginahanglanon, ingon man ang pagtumbok sa mga kakulangan o gaps aron maandaman ang mga preparasyon sa dili pa moabot ang pinakagrabe nga epekto sa hulaw
Hugot usab nga gidasig ni DRRMO Damasco, Jr. ang tanang mga dakbayan ug lungsod (C/MLGUs) sa pag-andam ug pagmugna sa ilang kaugalingong mga contingency plan.
Kini nga lakang sumpay sa gihimong unang tigom niadtong Hunyo 11, 2026, diin gipailawom na sa Blue Alert Status ang Emergency Operations Center sa lalawigan. Base sa datus gikan sa PAGASA, gilauman nga magsugod ang epekto sa El Niño karong Oktobre ug posibleng molungtad kini hangtod sa Pebrero 2027.
Photo Courtesy:PGO – PDRRMO Bukidnon
