Patay na nga nadiskobrehan ang usa ka 50-anyos nga mag-uuma nga nahulog sa lawom ug kabukirang pangpang human kini gilutos ug giatake gamit ang sundang sa kanhi bana sa iyang uyab didto sa Barangay Mt. Nebo, Valencia City, Bukidnon.
Giilang ang biktima nga si Pedro Balansag Jimenez, residente sa Lantapan, napalgan pasado alas 11:00 sa buntag ug na-report sa kapulisan kagahapon Setyembre 8, 2026, diin naa na kini sa porma sa pagkadugta diha sa daplin sa Hydro Manopali River.
Base sa imbestigasyon sa kapolisan, nahitabo ang tragedya niadtong Setyembre 5 sa buntag samtang nagbiyahe ang biktima sakay sa iyang motorsiklo uban ang iyang uyab ug ang tulo ka bata niini padulong sa Valencia City. Sa dihang nihunong sila sa daplin sa dalan sa Mt. Nebo para sa personal nga panginahanglan, kalit nga nibutho ang suspek nga si Vilcon Cayude Cardente, 45-anyos ug kanhi bana sa babaye. Dali nga milabni og sundang ang suspek ug giatake ang biktima, hinungdan nga misulay sa pagdagan si Pedro apan nahulog kini sa pangpang nga adunay giladmon nga 80 hangtod 100 ka metros.
Gipahigayon gilayon ang retrieval operation sa Valencia Rescue Team ug sa kapulisan sa Valencia nga gipangulohan ni PEMS Edwin Lumaygay ug PMSg Rey Allan Galgo, diin nitabok pa sila sa suba pinaagi sa pagbaktas aron maabot ang hilit nga dapit. Sa karon gitugyan na sa Villanueva Funeral Homes ang maong patay’ng lawas, gipadayag sab sa kapulisan nga walay agi sa tinigbasan ang biktima samtang gi-atubang ang padayong lakang batok sa suspetsado.
Photo Courtesy: Valencia City Police Station
