Gipahibalo ni Department of Social Welfare and Development (DSWD) Secretary Rex Gatchalian nga hinay-hinay nang gipalapdan sa ahensya ang paggamit sa digital channels alang sa pag-apod-apod sa ayuda sa tibuok nasod. Bisan pa man sa maong kalamboan, nagpabili gihapon nga usa ka dako nga hagit alang sa ahensya ang kakulang sa mga bank account sa kadaghanang benepisyaryo nga gikatala sa ilang listahan.
Gipasabot ni Gatchalian nga fully digital na karon ang paghatag sa financial assistance ubos sa Walang Gutom Program ug 4Ps. Apan sa laing bahin, nagpadayon pa ang proseso sa digitization para sa ubang social protection programs sama sa Assistance to Individuals in Crisis Situation (AICS) ug ang Unified Package for Livelihoods, Industry, Food, and Transport (UPLIFT). Sa UPLIFT pa lamang, giplanohan nga himuong digital ang payout alang sa 2.5 milyong benepisyaryo, apan sa gihimong validation, nasayran nga 20 porsyento lamang kanila ang adunay kaugalingong bank account.
Aron masolusyonan kini nga sitwasyon, nakigtambayayong na ang DSWD sa Bangko Sentral ng Pilipinas (BSP) aron dali nga ma-enroll ang mas daghang benepisyaryo sa formal banking systems. Sa ingon niining paagi, mas paspas, luwas, ug hapsay nga digital distribution sa ayuda para sa tanang nanginahanglan
Photo Courtesy:DSWD
