Gikan sa binhi sa kape hangtod sa pagbukas sa giandam nga airport, gipahimug-atan ni Governor Rogelio Neil P. Roque nga ang tanang oportunidad kinahanglang maghatag og tinuod ug molahutay nga panginabuhian sa katawhan sa Bukidnon.
Kini ang gipadayag sa gobernador sa iyang mensahe atol sa Monthly Convocation sa Provincial Government of Bukidnon niadtong Setyembre 7, 2026, sa Kaamulan Folk Arts Theater, Malaybalay City, diin iyang gipasiugda nga ang kalamboan sa agrikultura kinahanglang maglakip sa tibuok value chain—gikan sa pagpananom, pagproseso, pag-roast, hangtod sa pagbaligya—aron ang mas dakong bahin sa kita magpabilin mismo sa kamot sa mga lokal nga mag-uuma ug negosyante.
Gawas sa agrikultura, gipahimangnoan usab sa gobernador ang probinsya nga kinahanglang mangandam na sa mga oportunidad nga dala sa pag-abli unya sa bag-ong airport pinaagi sa pagpalambo sa turismo.
Gipasabot sa gobernador nga dili igo ang pagbaton og nindot nga kabukiran, lasang, kultura sa mga Lumad, ug lokal nga produkto kondili kinahanglan hinuon nga mahimong andam ang komunidad sa paghatag og maayong serbisyo aron masinati ug mahinumdoman sa mga bisita ang hapsay nga biyahe ug kaayohan sa Bukidnon
Photo Courtesy: LGU Bukidnon
