Nakit-an nga wala nay kinabuhi ang usa ka 49-anyos nga inahan nga una nang gikatahong na-missing, samtang kini naglutaw sa Sawaga River sa Purok 8, Barangay 9, Malaybalay City, Bukidnon, kapin alas 7:00 sa buntag niadtong Lunes, Setyembre 7, 2026.
Ang biktima nga si Mary Leother “Bebing” Mier, pormal nga giila sa iyang pamilya ug residente sa Purok 6, Barangay Casisang sa maong dakbayan.
Sumala sa mga kabanay, katapusang nakita si Mier sa ilang panimalay pasado alas 12:00 sa kaadlawon niadtong Setyembre 6 human nananghid nga mangihi apan wala na makabalik.
Gikumpirma sa anak sa biktima nga adunay maintenance medication ang iyang inahan tungod sa nervous breakdown, ug giangkon niini nga nakasulti na ang inahan niadtong Setyembre 4 bahin sa plano nga paglukso sa tulay duol sa lugar kung asa kini nakit-an.
Gidugang usab sa bana sa biktima nga si Eduardo Mier nga dili kini maoy unang higayon nga kalit nga mobiya sa ilang panimalay ang iyang asawa tungod sa iyang kondisyon. Sa kasamtangan, giandam na sa pamilya ang pagpahiluna sa patayng lawas, samtang padayon ang imbestigasyon sa mga awtoridad aron masuta ang pormal ug tinuod nga hinungdan sa maong trahedya.
