Gihingusgan sa Department of Trade and Industry (DTI) nga makuha ang zero tariff sa mga eksport sa saging ngadto sa Japan ubos sa pag-rebisa sa Japan–Philippines Economic Partnership Agreement (JPEPA).
Gipadayag ni Trade Secretary Cristina Roque nga ang pagpaubos sa kasamtangang 8 hangtod 18 porsyento nga buhis nga gipahamtang sa Japan sa saging gikan sa nasod maoy usa sa mga pangunang gituki sa negosasyon aron mas mahimong kompetitibo ang Pilipinas kumpara sa mga silingang nasod sa ASEAN.
Taliwala sa maong taas nga buhis, nakabawi gihapon ang Pilipinas isip ikaduhang pinakadakong exporter sa saging sa kalibutan sunod sa Ecuador human maka-eksport og hapit tulo ka milyon nga metric tons tungod sa pag-uswag sa produksyon ug pagkaayo sa mga plantasyon gikan sa peste.
Dugang pa ni Roque, nagkahiusa ang duha ka nasod nga tapuson ang negosasyon karong Nobyembre subay sa direktiba ni Presidente Ferdinand Marcos Jr. nga mahuman ang mga free trade agreement ug masulbad ang mga babag sa patigayon sa agrikultura ug automotive.
Photo Courtesy: da.gov.ph
