Midalit og impresibong performance ang duha ka batan-ong swimmers gikan sa Bukidnon human makatigom og walo ka medalya—lakip ang upat ka gold ug usa ka bag-ong tournament record—atol sa 3rd Asian Open Schools Invitational Short Course Swimming Championships sa Bangkok, Thailand niadtong Agosto 29–30, 2026.
Nakigbatok ang duha batok sa mga partisipante gikan sa 14 ka nasod, diin ang ilang kalampusan gilaumang magsilbing dakong inspirasyon sa uban pang batan-ong atleta sa probinsya.
Nanguna sa maong medal haul ang 6-anyos nga si Solana Aislah “Daday” Ayco sa Valencia City, kinsang nakasakmit og upat ka gold sa 25m ug 50m butterfly ug freestyle events, duha ka silver sa breaststroke, ug giparangalan puy-an isip 2nd Most Outstanding Swimmer sa iyang kategorya human mitala og bag-ong tournament record sa 25m butterfly. Samtang, ang 8-anyos nga si Julia Lois Palo sa Malaybalay City nidugang usab og duha ka silver medals sa girls’ 8-and-under 50m freestyle ug 50m butterfly events.
Matud pa sa mga ginikanan ug coach sa duha ka bata, walay shortcut ang ilang kalampusan tungod sa gipadayon nga seryosong training sa Valencia City taliwala sa ulan, kainit, ug limitadong pasilidad. Gawas sa pisikal nga pagbansay, gipangandaman usab nila ang mental preparation ug sakto nga pagdumala sa pressure sa dako ug pang-international nga kompetisyon
Photo Courtesy:Ayco and Palo Families
