Nasikop ang tulo ka mga suspek, duha ka lalaki ug usa ka babaye, human nalambigit sa pagpangulata sa usa ka 48-anyos nga lalaki sa Barangay Pinelayan, Quezon, Bukidnon, pasado alas-3:40 sa kadlawon niadtong Septiyembre 6, 2026. Ang mga suspek gitugyan sa mga barangay tanod ngadto sa Quezon Municipal Police Station.
Base sa imbestigasyon, nag-inom ang mga suspek ug ang biktima sa usa ka disco atol sa pista sa barangay. Sa pagpauli sa biktima sakay sa iyang motorsiklo, giingong gisundan siya sa mga suspek ug gikulata gamit ang mga pinutol nga poste sa kawayan, hinungdan nga nakaangkon siyag mga samad sa nagkalain-laing parte sa lawas ug gidala sa Bukidnon Provincial Hospital sa Maramag alang sa pagtambal.
Narekober usab sa kapulisan ang duha ka pinutol nga poste sa kawayan nga adunay mga lama sa dugo sa lugar sa insidente. Padayon ang imbestigasyon aron matino ang motibo sa pagpangulata, samtang ang tulo ka suspek anaa na sa kustodiya sa Quezon MPS alang sa tukmang disposisyon
Photo Courtesy: Quezon MPS
